Filipa César, Marine Hugonnier, Rosalind Nashashibi, Anri Sala eta Rui Toscanoren lana batera azalduz, erakusketa honek gure ingurunea - gure egunerokotasuna, bizi ditugun espazio pribatu eta publikoak, hiriak, ikuspegi panoramikoak, paisaiak eta baita gure historia ere - bi aldiz begiratzera bultzatzen gaituzten bideo lanak elkartzen ditu. Mundua begiratzeko modu ezberdinen bitartez, eta elkarrengandik erabat desberdinak diren lurraldeetan filmatutako lanekin, hala nola, Afganistan, Albania, Brasil, Alemania, Portugal, Palestina eta AEB, Look Again erakusketako bideoek zer ikusten dugun eta ikusten dugun hori nola ikusten dugun planteatzera garamatzate.
Rui Toscanoren bideoak Brasilgo hiri paisaiaren argazki edo pintura gisa har genitzake, baina itxura batean estatikoak diren irudi horiek etengabeko mugimendua eta aktibitatea gordetzen dute euren baitan. Filipa Césarrek lantokietako eta espazio publikoetako eguneroko jarduna erregistratzen du, gero irudi horiek editatu eta eraldatuz, esanahi eta pertzepzio berriak sortzeko. Egunerokotasuneko xehetasun arruntak, une lasaiak edo eguneroko erritualak behatuz Rosalind Nashashibik besteen bizitzetan sarrarazten gaitu, eta loturarik gabeko mundu baten narratibak agertzen dizkigu. Hori bera egien du Anri Salak ere. Bere lanak denboraz kanpokoak eta antzinakoak, intimoak eta urrunak dirudite, eta egungo munduan gizabanakoak bakardadean aurrera eraman behar duen borroka islatzen dute. Azkenik, Marine Hugonnierrek paisaiaren politika eta bere errepresentazioa aztertzen ditu, Afganistanen hasi eta Brasilgo Amazonaseraino, eta zalantzan jartzen ditu leku horietaz dugun pertzepzioa eta iruditeria, baita guretzat duten esanahia ere.
Look Again erakusketaren osagarri gisa, Tabakalerak bitartekotzari loturiko hainbat jarduera ere antolatuko ditu. Alde batetik, zentroko aretoetako bat egokituko da bertan errodaje tailerrak egiteko, travellinga erabiliz. Tailer horiek haurrentzat nahiz helduentzat izango dira. Bestalde, bisita gidatu bereziak ere izango dira erakusketan, zenbait artistek eta ikus-entzunezkoen sortzaileek eskainiak.
Artistak:
Filipa César - 1975an Porton (Portugal) jaioa. Gaur egun Berlinen bizi da.
Marine Hugonnier - 1969an Parisen (Frantzia) jaioa. Gaur egun Londres bizi da.
Rosalind Nashashibi - 1973an Londres (Erresuma Batua) jaioa, gaur egun bertan bizi da.
Anri Sala - 1974an Tiranan (Albania) jaioa. Gaur egun Berlin eta Paris artean bizi da.
Rui Toscano - 1970an Lisboan (Portugal) jaioa. Gaur egun Lisboa bizi da.
Komisarioa: Carolina Grau
