TABAKALERA

Zinema ikasleen nazioarteko topaketa Masterclass jardunaldi batekin abiatuko da, irailaren 22an. Jardunaldiak ikusentzunezkoen esparruan sortzen ari diren joera berriak izango ditu ardatza eta bi zatitan banatuko da:

3D ZINEAREN INGURUKO TAILERRA

Manolo Gómez Santos, Dygra Films-eko lehendakariak, 3D zine digitalaren inguruan masterclassa eskainiko du eta bere konpainiak garatutako Dygra Native Digital 3D sistema aurkeztuko du. 3D zine estereoskopiko digitala oinarri duten ekoizpenekin pentsatuta sortu dute. Teknologia berri horrek publizitatean, telebistan eta zinean eduki ditzakeen erabilerak aztertuko dira eta "Holy Night!", Espainian 3D digitala erabiliz eginiko lehen ekoizpenaren inguruan jardungo dira. Ondoren, Panavisionek "Kroston" pelikula aurkeztuko du.

NAZIOARTEKO TRANSMEDIA JARDUNALDIA

Lance Weilerrek eskainitako hitzaldi bat, kasu praktiko baten azterketa eta transmediak eragindako aldaketen inguruko eztabaidak osatuko dute jardunaldia. Helburu nagusia etengabe sortzen ari diren fikziozko arkitektura berriak ezagutaraztea da, kultura digitalak berezkoa duen elkarlan metodologiak oinarri hartuta garatzen ari diren kontatzeko modu berrienak aurkeztea.

Lance Weilerrek "Transmedia: istorioak kontatzen pantailaz haratago" hitzaldia eskainiko du. Transmedia proiektuek ekoizleen eta hartzaileen interesa pizteko beharrezko ezaugarrien inguruan jardungo da.

Robert Figuerasek PANZER CHOCOLATEproiektua aurkeztuko du, Espainian sortutako lehen transmedia luzemetraia. Oinarri duen istorioa erabiltzaileekin elkarlanean sortu dute eta luzemetraiaz gain, mugikorrentzat egokitutako edukiak, sarean ikusgai dagoen motion comic bat, bideojokuak, errealitate areagotua eta beste hainbat euskarri garatu dituzte.

Jardunaldia amaitzeko Ian Ginn, ekoizle eta transmedia gaietan adituak, moderatuko duen eztabaida antolatu dugu. Gai ezberdinak jorratuko dira, besteren artean:

• Ikusentzunezko eduki digitalen ekoizpen eta banaketa prozesuen aldaketa
• Zine eskolak, eta bestelako hezkuntza zentroak, sortzen ari diren transmedia arkitektura berriek eta mundu digitala besterik ezagutu ez duten ikasleek eragindako errelitatera egokitzeko beharra.
• Ikusentzunezko industria eta profesionalak, transmedia edukien eskaera eta ekoizpen modu berriak tarteko, egokitzeko beharra.

 MASTERCLASS JARDUNALDIAREN PROGRAMA

Irailak 22, Príncipe zineman:
11:00-12:30 – 3D zinegintzari buruzko tailerra,  Dygra Films-en eskutik
12:30– Panavisionek eskainita – Kroston pelikularen teaserra

Arrasate kaleko Kutxaren aretoan:
15:00 Transmedia jardunaldia:
15:00 – 15:20 – Ian Ginn-en aurkezpena
15:20 – 16:20 – Lance Weilerren hitzaldia “Transmedia: istorioak kontatzen pantailaz haratago”
16:20- 17:00 –  Coffee break
17:00-18:00 – Kasu praktikoa: “Panzer Chocolate”
18:00 – 19:00 – Transmedia formakuntza eta arkitekturek eskaintzen dituzten aukera berriei buruzko eztabaida saioa.

Club Kursaal aretoan:
20h00: Zinema ikasleen nazioarteko topaketaren IX. edizioaren aurkezpen ekitaldia