Tabakaleraren Berritze Arkitektonikorako Nazioarteko Lehiaketa irabazi duen proiektua Juan Manuel Montero Madariagak eta Naiara Montero Viarrek aurkeztu zuten, '3 en RAYA' izenburupean.
Irabazle suertatu den proposamenak hiru norabidetan laburbiltzen du euren gogoeta arkitektonikoen prozesua:
Hiriko kokapena. Tabakalera gune central bezala ulertzen du Egia auzoa eta Kristina Enea parkea hiriko erdigunearekin elkartzen dituen ardatz horretan. Hiriko komunikazio azpiegiturei dagokionez ere eraikinaren kokapena giltzarri dela azpimarratzen du: tren geltokiak aurki A.H.T.ren geltokia eta autobus geltoki nagusia hartuko ditu. Ondorioz, Tabakalera komunikazio gune bilakatuko da, auzo arteko "eraikin-bisagra" eta hiriari zentralitate berri bat emango dion kokalekua.
Eraikinaren izaera arkitektonikoa, eraikina "hiriko ikono" bilakatzen duena. Gutxitan esan liteke eraikin bat enblematikoa denik, soilik hainbat faktorek bertan bat egiten dutenean: bere tamainak, balio historikoak, izaera arkitektonikoak eta garrantzi tipologikoak.
Tabakalera proiektua ikusizko arteei eskainitako etorkizuneko kultur zentro gisa. Ikusizko eta ikus-entzunezko sorkuntza garaikidea bultzatuko ditu, eta hiriari zabaldutako gunea izango da.
Eraikinaren balio arkitektonikoa eta tipologikoa aztertu ostean, proiektuak honen ezaugarri adierazgarrienak mantentzeko eta balioesteko estrategiak zehazten ditu. Horrela, proiektua uneoro eraikuntza-koherentzia gorena mantentzen saiatzen da, eraikinaren egituretan interbentzio minimoak egiteko helburuarekin.
Proiektuaren proposamenak eraikinaren iparreko aldean (egungo lurpeko pasabidea, hiriko erdigunea Egia auzoarekin lotzen duena) "loggia" bat eraikitzea proposatzen du, plaza hiritar berri bat sortuz sotoaren kotan, funtzio anitzekoa eta neurri batean estalia izango den espazio bat. Horrela, lurpeko pasabide aldetiko sarbideari soluzio bat emango lioke eta zuzenean komunikatu ahal izango litzateke eraikineko sarbide mekaniko berriekin eta etorkizuneko Tabakalera gurutzatuko duen "kale nagusiarekin".
Eraikuntza berriko espazio hiritar hori, 'loggia', proiektuaren oinarrizko pieza da; giltzarria da proiektuaren goiburuari bide ematen dion 'hiru lerroan' osatzeko. Balizko diagonal baten bidez, jokoan dauden hiru fitxak erlazionatzea lortuko litzateke horrela: Kristina Enea parkea (eta Egia auzoa), Tabakalera eta ibaiaren beste aldean kokatutako hiriaren zabalgunea.
Proposamenak biltzen duen beste jarduketa bat, eraikinaren erdiko gorputzaren gainean beirazko bolumen berri bat eraikitzea litzateke, energia alternatiboak bilatzeko (plaka fotovoltaikoak) eta eraikinaren irudi simetrikoa indartzeko helburuarekin. Azken solairu esanguratsu honek jatetxeetara bideratutako espazio publikoak hartuko ditu, hiriaren gaineko ikusmira zoragarriekin, eta gauez argi bolumen batean bilakatuko da, hiriko itsasargi handi bat bailitzan. Proiektuak egun eraikinaren sarrera dagoen lekuan altzairu eta beirazko gorputz txiki bat kokatzea ere proposatzen du. Honek etorkizuneko Tabakaleraren sarrera eta harrera zerbitzuak beteko ditu, eta era berean, aurreikusitako egitaraua proiektatzeko pantaila baten euskarri ere izango da.
Urumea ibaiari begira dagoen fatxadari dagokionez, proiektuak kontuan hartzen du trenbideen gainean plataforma handi bat eraikitzeko burutu daitekeen proiektua, eraikinaren lehen solairuaren altueran geratuko litzatekeena.
Azkenik, proposamen honekin Lehiaketaren Oinarrietan aurreikusitako erabilpenekiko egokitzapena ahalik eta zorroztasun handienarekin burutzen saiatzen da proiektua, bai azalerei dagokienez, erabilpen eta instalazioen gertutasunari dagokionez eta baita mota ezberdinetako sarbideei dagokienez ere.
